१२ पुस । काठमाडौं । उच्चस्तरीय राजनीतिक वार्ता टोलीले मुलुक हाल द्वन्द्वरत अवस्थामा नरहेको निश्कर्षसहित हालसम्म गरेका प्रगति प्रतिवेदन बुझाएको छ ।
प्रधानमन्त्री केपी शर्मा ओलीलाई बुझाएको प्रतिवेदनमा विप्वल नेतृत्वको नेकपा वार्तामै आउन नचाहेको तथा तराईमा गतिविधि चलाउँदै आएको सिके राउत समुह राजनीतिक नभएकाले उसँग वार्ताको एजेण्डा नै नबनाइएको उल्लेख छ ।

त्यस्तै, वार्ता समितिले आफ्नो कार्यकालमा ३ वटा समुहसँग हतियार बुझेको र उनीहरुलाई निशस्त्र घोषणा गरेको पनि जनाएको छ । विप्लव नेतृत्वको नेकपासँग पटक–पटक वार्ताका लागि प्रयास गरेपनि सफल हुन नसकेको तर भविश्यमा विप्लव नेतृत्वको नेकपासँग वार्ताको ढोका खुल्लै राखेर प्रतिवेदन बुझाएको समितिका संयोजक सोमप्रसाद पाण्डेले जानकारी दिएका छन् ।

संयोजक पाण्डेका अनुसार समितिले २६ वटा विभिन्न समुहसँग वार्ता गरेपनि खुम्बुवान मुक्ति मोर्चा जनतान्त्रिक तराई मुक्ति मोर्चा र विवेक साह समुहले मात्रै हतियार बुझाएको जानकारी दिएका छन् । गत भदौ ८ गते मन्त्रिपरिषदले सांसद पाण्डेको संयोजकत्वमा ५ सदस्यीय अधिकार सम्पन्न उच्चस्तरीय वार्ता समिति गठन गरेको थियो ।