बाँस्कोटाको ७० करोड प्रकरण प्रधानमन्त्रीको जानकारीबिना सम्भव छैनः सिपी गजुरेल
![](https://www.bagmatisamachar.com/wp-content/uploads/2020/02/cp_gajurel_with_rishi_dhamala__1_aWn3XvefSS.jpg)
११ फागन । काठमाडौं । आइतबार रिपोर्टर्स क्लब नेपालले राजधानीमा आयोजना गरेको साक्षात्कारमा देशभक्त गणतान्त्रिक मोर्चाका संयोजक तथा नेकपा (क्रान्तिकारी माओवादी) का उपाध्यक्ष सिपी गजुरेलले वर्तमान सरकारका प्रवक्ता नै भ्रष्टाचार काण्डमा मुछिएको अवस्थाले सरकारीस्तरमा हुने गरेको भ्रष्टाचारको पटाक्षेप गरेको बताएका छन् ।
गजुरेलले साक्षात्कारमा गोकुलप्रसाद बाँस्कोटालाई राजीनामा मात्रै गराउनु पर्याप्त नभएको पनि बताए । उनले भने, यदि स्वीस कम्पनीसँग अन्तरविरोध नभएको भए ठूलो मात्रामा भ्रष्टाचार हुन लागेको रैछ नि, २६ अर्बमा हुने कुरा लागत बढाएर ४० अर्ब पु¥याईएको रहेछ, यत्रो ठूलो रकम खाने योजना रहेछ ।
मन्त्री बाँस्कोटाले ७ वटा योजनामा एक खर्ब खाने योजना बनाएको तथ्य पनि मिडियामा आएको उल्लेख गर्दै गजुरेलले भने, अनि हामीले देश विकास होला भनेर कसरी कल्पना गर्ने ? सरकारले समृद्ध नेपाल, सुखी नेपाली’ को नारा दिएर बकवास गरिरहेको समेत उनको भनाइ छ ।
गजुरेलले थपे सामान्य नागरिकले आफ्ना छोराछोरी पढाउन तथा उपचार गराउन सक्ने अवस्था नभएको बेला सरकारका मन्त्री नै यसरी भ्रष्टाचारमा लिप्त भएपछि मुलुकको यो अवस्था हुनु त सामान्य नै भयो नि ।
तत्कालीन सञ्चारमन्त्री बाँस्कोटाको ७० करोड कमिसन प्रकरणबारे गम्भिर छानबिन हुनुपर्ने उनले बताए । उक्त प्रकरणको नैतिक जिम्मा प्रधानमन्त्री केपी शर्मा ओलीले पनि लिनुपर्ने उनको भनाइ थियो । उनले भने, प्रधानमन्त्रीको जानकारीबिना यो सम्भव छैन ।
गजुरेलले उक्त अडियो दुई महिना पहिले नै प्रधानमन्त्रीकहाँ पुगेको कुरा आएको टिप्पणी गर्दै प्रश्न गरे, उहाँले यो कुरा यत्रो दिन किन गुपचुप राख्नुभयो ? यसले पनि यो प्रकरणमा प्रधानमन्त्रीको पनि कुनै न कुनै रुपमा संलग्नता देखिने उनको भनाइ थियो ।
अख्तियारले सत्यतथ्य छानबिन गर्ने कुरामा विश्वास छैन, उनले भने, अख्तियार त सरकारले जे भन्यो त्यही गर्छ । उनले यो प्रकरणमा अख्तियारलाई छानबिन गर्न दिएर कतै बाँस्कोटालाई जोगाउन चलखेल भइरहेको त छैन भन्ने आशङ्कासमेत उनले गरे ।
प्रतिक्रिया दिनुहोस्: