काठमाडौं । २६ वैशाख । आफूहरुले देश जान पाउनु पर्छ भन्दै सिंहदरबारको गेट अगाडि प्रर्दशन गर्न आएका चिनियाँ नागरिक पक्राउ परेका छन् । उनीहरु सबैलाई नगर प्रहरीको कार्यालयमा राखिएको छ । सिंहदरबारको गेटमा प्रहरीमाथि आक्रमण गरेको आरोपमा ४७ जना चिनियाँ नागरिक पक्राउ परेका छन् ।

निषेधित क्षेत्र र त्यसमाथि लकडाउनको समयमा प्रदर्शन गर्न थालेपछि प्रहरीले रोक्न खोज्दा उनीहरु प्रहरीमाथि जाइलागेका थिए । त्यस क्रममा महानगरीय प्रहरी वृत सिंहदरबारका डीएसपी हरिबहादुर बस्नेत र एक प्रहरी जवान घाइते भएका थिए । त्यस क्रममा ४ जना चिनिया नागरिक पनि घाइते भएका थिए ।

प्रदर्शन रोक्न खोज्दा चिनियाँहरु प्रहरीमाथि नै जाइलागेका थिए । यसअघि पनि उनीहरुले स्वदेश फिर्ता जान पाउनुपर्ने भन्दै दूतावाससँग आग्रह गरेका छन् । उनीहरुलाई के गर्ने भन्नेबारे छलफल भइरहेको महानगरीय प्रहरी कार्यालय रानीपोखरीका डीआईजी विश्वराज पोखरेलले जानकारी दिए ।