६० किलो सुन प्रकरणमा भेटिएन ‘हाई प्रोफाइल’ को संलग्नता
![](https://www.bagmatisamachar.com/wp-content/uploads/2023/08/cib-768x497.jpg)
काठमाडौँ । ६० किलो सुन तस्करी प्रकरणपछि केन्द्रीय अनुसन्धान ब्युरो (सीआईबी) ले गरेको अनुसन्धानबाट हाई प्रोफाइल व्यक्तिको संलग्नता नभेटिएको पाइएको छ । सीआईबीको दोस्रो चरणको अनुसन्धानबाट बनेको ५६२ पृष्ठ लामो प्रतिवेदन सरकारी वकिलको कार्यालयलाई बुझाइसकेको छ ।
२ खर्ब ६६ अर्ब ६७ करोड बिगो दाबी गर्दै मुद्दा दायर गर्नुपर्ने रायसहित बुझाइएको प्रतिवेदनको अध्ययनका क्रममा हाई प्रोफाइल व्यक्तिको ‘कनेक्सन’ नभेटिएको बताइएको छ । सीआईबी प्रमुख श्यामलाल ज्ञवालीले ६० किलो सुन तस्करी प्रकरणमा हाई प्रोफाइल नाम नभेटिएको बताएका हुन् ।
अनुसन्धानका क्रममा संलग्नता देखिएको भए प्रतिवेदनमा नाम जोडिन्थ्यो । तर संलग्नता नपाइएपछि यो प्रकरणमा अहिलेसम्म हाई प्रोफाइल संलग्नता नभेटिएको सीआईबीले तयार पारेको प्रतिवेदनबारे जानकारी दिन आज आयोजित कार्यक्रममा जानकारी दिइएको हो ।
यद्यपि सीआईबीका अनुसार ६० किलो सुन तस्करी प्रकरणको अनुसन्धान सकिइसकेको छैन । यतिबेला दोस्रो चरणको अनुसन्धानबाट देखिएको तथ्यका आधारमा मात्रै प्रतिवेदन बुझाइएको बताइएको छ ।
प्रतिक्रिया दिनुहोस्: