काठमाडौं । काठमाडौंको गोकर्णेश्वर नगरपालिका ३ स्थित गाम्छामा आमा र दुई छोराछोरी मृत अवस्थामा भेटिएका छन् ।

३३ वर्षीया सीता मोक्तान, उनकी छोरी अंशु मोक्तान र दुई महिनाका बालक मृत अवस्थामा भेटिएको जिल्ला प्रहरी परिसर काठमाडौंले जानकारी दिएको हो ।

प्रहरीका अनुसार तीन जनाकै शव सडेको अवस्थामा छ । सीताका श्रीमान् कान्छा नगरकोटीले १६ गते कार्तिकदेखि श्रीमती र दुई छोराछोरी हराएको भन्दै प्रहरीलाई खबर गरेका थिए । प्रहरीले खोजी गर्दा आफ्नै घरमा उनीहरूको शव फेला परेको हो ।

प्रहरीका अनुसार घरमा बाहिरबाट ताला लगाइको थियो । १६ कार्तिकदेखि कान्छा नगरकोटीले आफू घरमा नरहेको बयान दिएको प्रहरीले जनाएको छ ।

घरको बाहिर नै ताला लागेको देखेपछि आफू बाहिरै बसेको उनले बयान दिएको प्रहरीको भनाइ छ । कान्छा प्रहरी नियन्त्रणमा छन् । घटनाबारे थप अनुसन्धान भइरहेको छ ।