काठमाडौं । ललितपुरको फुल्चोकी जंगलमा सोमबार दिउँसोबाट हराएका १३ जना गएराति फेला परेका छन्।

सोमबार दिउँसो फुलचोकी घुम्न गएका १३ जना युवायुवतीलाई गएराति नौ बजेतिर प्रहरीले सकुशल उद्धार गरेको जिल्ला प्रहरी परिसर ललितपुरका प्रवक्ता एसपी नवरत्न पौडेलले जानकारी दिए।

प्रहरीले भेटेका सबैलाई आफन्तको जिम्मा लगाएको एसपी पौडेलले बताए । बाटो भुलिँदा आफूहरु हराएको उनीहरुले प्रहरीलाई बताएका छन् ।

सोमबार फुल्चोकी घुम्न गएका १० जना युवक र तीनजना युवती दिउँसोदेखि बाटो भुलेर जंगलमा हराएका थिए। उनीहरु हराएको सूचना पाएपछि प्रहरीले उद्धार कार्य सुरु गरेको थियो।

गोदावरी नगरपालिका–३ फुल्चोकीमा हाइकिङका लागि गएका सात जनाको एक समूह अपराह्न साढे तीन बजेदेखि र ६ जनाको अर्को समूह चार बजेदेखि हराएको जानकारी आएपछि प्रहरीले खोजी कार्य सुरु गरेको थियो ।