Bagmati Samachar Logo

मकवानपुरमा हत्या आरोपमा ७ जना पक्राउ

हेटौंडा । मकवानपुरमा हत्या आरोपमा ७ जना पक्राउ परेका छन् । हेटौंडा उपमहानगरपालिका वडा नम्बर–१६ हटियाका मिलन दंगालको हत्या आरोपमा पक्राउ परेका हुन् । हत्या आरोपमा प्रहरीले चार जना महिला र तीन जना पुरुष पक्राउ गरेर अनुसंधान अगाडी बढाएको छ ।

यही चैत १९ गते बेलुकाको समयमा मकवानपुरको बागमती गाउँपालिका वडा नम्बर–८ भुवनचुलि देउडीभञ्ज्याङ स्थित धरान चतरा सडकको नालीमा हत्या गरिएको अवस्थामा दंगाल फेला परेका थिए ।

७ जनालाई दंगालको हत्या गरेको आसंकामा प्रहरीले पक्राउ गरेर जिल्ला अदालत मकवानपुरमा सात दिनका लागि म्याद थप गरेको छ । हटिया बस्ने ३७ को मिलन दंगाल चैत २० गते बिहान साढे ६ बजेको समयमा मृत अवस्थामा फेला परेको भनि प्राप्त सुचनाको आधारमा प्रहरी कार्यालयबाट अनुसन्धान अधिकृतको कमाण्डमा प्रहरी टोली घटनास्थलमा खटेको थियो । प्रहरीको प्रारम्भिक अनुसन्धानको क्रममा ७ जनालाई पक्राउ गरेको जिल्ला प्रहरी कार्यालय मकवानपुरका प्रहरी नायब उपरिक्षक श्यामु अर्यालले बताए ।

पक्राउ पर्नेमा मकवानपुरको बकैया गाउँपालिका वडा नंम्बर–३ बस्ने ३६ वर्षिय प्रशान्त लामा, ललितपुर गोदावारी नगरपालिका वडा नंबर– १२ बस्ने २४ वर्षिय किसन दानी बारा निजगढ नगरपालिका वडा नम्बर–३ बस्ने १९ वर्षकी इनिसा तिमल्सेना, हेटौडा उपमहानगरपालिका वडा नंम्बर– १५ बस्ने १९ वर्षकी सुस्मिता तामाङ, सिन्धुली मरिन गाउँपालिका वडा नंबर–७ बस्ने २० वर्षिय शर्मिला मुक्तान, सोही ठाउँकी १९ वर्षिय रोजिना तामाङ, हेटौडा –१६ बस्ने २८ वर्षिय सुजन पौडेल रहेका छन् ।

प्रहरीले पक्राउ गरेकामध्य दंगालका साथी पनि छन् । दंगालको टाउकोमा चोटपटक रहेको छ । बेलुका होटलमा झैझगडा भएको थियो । आपसी झगडाको कारणले उनको हत्या गरेको हुन सक्ने प्रहरीको अनुमान छ । थप अनुसन्धानबाट के कारणले हत्या भएको हो भन्ने खुल्ने प्रहरीले बताएको छ ।